Guldal episoda

Valáštallan organisašuvdnan

Mennesker som elsker å utøve sin sport
Mennesker som elsker å utøve sin sport

Valáštallan Norggas lea stuorra organisašuvdna, nu ahte dat lea juhkkojuvvon máŋgga dássái. Leat valáštallanstivrrat maid Norgga Valáštallanlihttu hálddaša, sierrasearvvit, valáštallanbiiret, sierrabiiret, valáštallanráđit ja valáštallansearvvit. Lea valáštallama bajimuš orgána, valáštallandiggi, gos mearriduvvo mo áššit galget dahkkot boahtteáiggis. Juohke dásis leat doaimmat láhčit dan ovdii vai sáhttá valáštallat Norggas.

Bija johtui:

Valáštallan organisašuvdnan

Norgga Valáštallanlihttu (Norges idrettsråd) ja olympialaš ja paraolympialaš lávdegottiin (NIF) leat 55 sierrasearvvi, 17 valáštallanbiire, 375 valáštallanráđi ja 10 787 valáštallansearvvi, ja das leat aiddo vuollel 2.100.000 miellahtu. Valáštallandikkis, mii dollojuvvo juohke nuppi jagi, mearriduvvo mo áššit valáštallamis galget dahkkot boahtteáiggis. Lea valáštallanstivrra doaibma fuolahit ahte mearrádusat maid valáštallandiggi lea dahkan čađahuvvojit. Sierrasearvvit, nu mo ovdamearkka dihte spábbačiekčan, čuoigan ja volleyspáppastallan organiserejit ja jođihit daid iešguđetge valáštallansurggiid, ja sis lea ovddasvástádus gilvodoaimmaide ja sierravaláštallama ovdánahttimii sihke nationálalaččat ja riikkaidgaskasaččat.

Sii geat barget Norgga Valáštallanlihtu hálddahusas dahket ollu doaimmaid sierraservviid ja valáštallanbiirriid ovddas, nu mo ahte doalahit oktavuođa stáhtalaš orgánaiguin, čállet ohcamiid ja juhket speallanruđaid viidásat.

Valáštallanbiiret leat juhkkojuvvon geográfalaš regiovnnaide ja sin doaibma lea ovddidit ovttasbarggu gaskal sierrabiirriid, ovttaskas valáštallanservviid, valáštallama organisašuvdnaovttadagaid, ja fylkkagielddaid. Biirret galget maiddá bagadit valáštallanservviid ekonomalaš, hálddahuslaš ja organisatoralaš áššiiguin.

Juohke sierrasearvvis lea maiddá sierrabiire. Sin doaibma lea hálddašit daid iešguđetge valáštallamiid fylkkain. Okta dain deháleamos doaimmain maid dahket lea čađahit oahpahusdoaibmabijuid ja fuolahit ahte kámppat, gilvvut ja sullasaččat čađahuvvojit sin valáštallansuorggis. Nu ahte, ovdamearkka dihte de lea Romssa Spábbačiekčanbiire (Troms Fotballkrets) mii ráhkada kámpaprográmma buot spábbačiekčanráidduide Romssas, daningo sis lea dát ovddasvástádus. Dat mearkkaša maiddá ahte lea sin ovddasvástádus háhkat duopmáriid kámppaide.

Valáštallanráđiin leat buot valáštallansearvvit mat leat miellahttun Norgga Valáštallansearvvis ovtta gielddas. Gielddain gos leat eanetgo golbma valáštallansearvvi galgá NIF láhkaortnega mielde leat valáštallanráđđi. Sii galget earret eará gaskkustit gielddalaš eiseválddiide makkár rusttegiid valáštallansearvvit dárbbašit, juohkit ruhtadeami stáhtalaš juolludanortnegiin báikkálaš joavkkuide ja servviide, ja bargat fátmmasteami ovdii valáštallanservviin. Muhttin gielddain leat bargit valáštallanráđis, muhto eanaš valáštallanráđiin leat eaktodáhtolaččat iešguđetge valáštallanservviin gielddain.

Valáštallansearvvit Norggas leat sierra organisašuvnnat mas leat persovnnalaš miellahtut, maid demokráhtalaččat válljejuvvon stivrrat jođihit, ja gos jahkečoahkkin lea valáštallansearvvi bajimuš váldi. Ii oktage sáhte eaiggádit valáštallansearvvi, go dat oamasta iežas. Valáštallansearvvi ulbmil lea jođihit valáštallama. Buohkat geat háliidit, sáhttet šaddat miellahttun. Lea maiddá nu ahte jus háliidat gilvvohallat, fertet leat miellahttun valáštallansearvvis.

Leat maiddá dihto meannudanvuogit maid ferte čuovvut. Valáštallansearvi ferte válljet miellahtuid dárbbašlaš luohttámušdoaimmaide stivrii, válgalávdegoddái, dárkkistanlávdegoddái ja eará doaimmaide ja luohttámušdoaimmaide maid jahkečoahkkin lea mearridan. Sii geat galget válljejuvvot dáidda fertejit leat miellahtot geaid sáhttá válljet. Dat mearkkaša ahte sii fertejit leat máksán miellahtodivvaga, leat deavdán 15 jagi ja leamaš miellahttun unnimusat ovtta mánu.

Valáštallansearvi mas lea okta valáštallan gohčoduvvo sierravaláštallansearvin, ja valáštallansearvvit main leat máŋggalágan valáštallamat gohčoduvvojit máŋggavaláštallansearvin. Fitnodatvaláštallansearvvit rekrutterejit iežaset miellahtuid bargosajiin ja iešguđetge fágalaš čoahkkádusain.

Mii oažžut almmolaš ruhtadeami čuovvovaččain:

Logo
Logo

Čuovo min sosiála mediain

Facebook logo